ثوروا بقى يا ناس ؟؟؟

"هي ثورة " من غير علامة إستفهام
يعني مش زي الفيلم الذي تحول إسمه بعد التعديل_ عشان خاطر عيون أمن الدولة_ من "هي فوضي " إلي "هي فوضي ؟ "
علامة الإستفهام تفرق يا جماعة زي ما قال أستاذ وائل الإبراشي في جريدة صوت الأمة
أيوه هي ثورة
هي ثورة و ملهاش حل تاني غير كدة
ثورة زي ما شالوا فاروق يشيلوا عمدة العزبة
بس اللى يقوم بالثورة يكون الشعب و الجيش مع بعض
و يكون تنظيم إسمه "شعب الأحرار " و ليس "الظباط الأحرار "
أنا زهقت بقي يا جدعان
و الله العظيم زهقت
يللا قوموا معايا أنا هثور لوحدي
دول عايزين يلغوا الدعم ...
يعني مصر كلها هتبقي فقيرة يعني لو اللى تحت خط الفقر 60 % هيبقوا 90%
ده رغيف العيش اللي بنتذل عشان نجيبه و في الآخر يطلع فيه مسامير هيزيد سعره بنسبه 50 %
يا نهار .......
دي حاجة تغيظ يا جدعان
مصر عاملة زي السمكة اللي الحكومة بتغرقها في الزيت وبعدين تقلبها و تشويها على النحيتين
مش كفاية إن الأسعار أساساً نار
و المرتبات أبرد من السكينة اللى الحكومة بتدبحنا بيها
البلد بتخرب
بتخرب إيه دي خربانة خلاص
خربانة يا بشر
قوموا بقي عشان نصلحها
مفيش حاجة عدلة في البلد
أنا أتخنقت بقي
نظام تعليم فاشل بيطلع أجيال فاشلة إقتصاد حالته بالبلي
مرور زي الزفت المشوار يتاخد في 5 دقائق دلوقتى يتاخدت في ساعة إلا ربع
منظر الشباب على القهاوي بيشربوا شيشة منظر مقرف

ده كفاية 67% من الشعب المصري معندهوش- لامؤاخذة - حمام أفرنجي بسيفون
كل يوم بنتنفس غازات سامة و بناكل خضار فيه دود
نص البلد عندها الضغط و النص التاني سكر و أمراض كبد و كلي و سرطان وفيرس سي
لأ و كل ده مش مهم المهم إن الممرضة تقلع النقاب عشان المريض يشوف حاجة حلوة على رأي زير - وليس وزير- الأوقاف
قال يعني خلاص طيب مش لما المريض ياخد الدوا الاول
ده الطفل بياخد 5 أو 6 حقن بسرنجة واحدة لغاية ما يموت
الشباب بقي معظمة هايف
قنوات ميلودي هتجيبلك شلل و روتانا مش هتقدر تصلي الفجر مسيطرة على الشباب
أيه كل ده
ده إحنا شعب بارد يا أخي
كل المشاكل دي و ساكتين
ما تقوموا بقي إنتوا لسة قاعدين قدام شاشة الكومبيوتر بتقروا باقي البوست
قوموا
مترضاش بالظلم حتى لو هتروح ورا الشمس
زي ما عمنا جيفارا قال
لن يكن لدينا ما نحيا من أجله إن لم نكن على إستعداد للموت في سبيله
حرام اللى بيحصل فينا حرام
أنا عندي أحلام و طموحات كتييييييييييييييييييييييييييييييييييييييير
عايز لما أعملها أكون عملاها في مصر
مش خارجها
تخيلوا لو زويل أخد نوبل في مصر لو مجدي يعقوب مقيم و كل عملياته الللا بيعملها في مصر
آآآآآآآآآآآآآآآآآآآآآآآآآآآآآآآه
تعبت
تعبت رغم إني لسه ماعيشتش
بس أنا خلاص مش هيهمني حاجة بعد كدة
طبعاً
ما هو أنا مش لاقي حل غير كدة
اللى عنده حل يقوله
أصل ماينفعش الإصلاح يكون من طرف الشعب و بس
لازم الشعب و الحكومة
و الحكومة دي و العمده ده
لازم نخلص منهم
ثوروا بقي يا ناس

هنعمل ايه بس ياعمرو

نصيبنا كدة يا عمرو

هو ده قدرنا ونصيبنا في دنيا مافهاش ضمير ولا امانه ولا اخلاق ومزيد من التقدم في منتدانا واهم حاجه هي حريه الراي

مهما طال الليل لابد من طلوع الفجر خلى عندك أمل فى بكرة يكون أحسن يا عمرو التشاؤم ده لا يغير ساكن لو كل واحد حاول يطور نفسه هنكون أحسن باذن الله .

نصيبنا
كدة يا عمرو

بجد انا بشكر يا اعضاء المنتدى الجميل
على ابداء ارائكم واتمنى ان شاء الله
التغير من داخلنا ونبدا احنا بانفسنا
وبجد بشكركم على ارائكم الجميلة